सार्वजनिक लेखा समितिमा उठ्यो जगदुल्ला जलविद्युत आयोजना ठेक्का प्रक्रियाको विवाद

काठमाडौं । बुधबार बसेको संघीय संसद्को सार्वजनिक लेखा समितिको बैठकमा १०६ मेगावाट क्षमताको जगदुल्ला जलविद्युत आयोजनासम्बन्धी ठेक्का प्रक्रिया र यसमा उठेका विवादका विषयमा गम्भीर छलफल भएको छ । बैठकमा आयोजनामा देखिएको ढिलाइ, ठेक्का प्रक्रियामा देखिएको अनियमितताबारे छलफल भएको हो ।

नेकपा माओवादी केन्द्रका उपमहासचिव तथा सांसद जनार्दन शर्माले आयोजनाको ढिलाइका कारण मुलुकलाई ठूलो आर्थिक घाटा भएको बताउँदै निर्माण प्रक्रियालाई तत्काल अघि बढाउन जोड दिए ।

उनले भने, ‘जगदुल्लाको कुरा के हो भने हामीले एक वर्ष ढिला गर्दा ३ अर्ब ७५ करोड गुमाइरहेका छौं । १८ महिनामा त्यो भन्दा बढी घाटा भइसक्यो । आज बैंकमा पैसा थुप्रिएर बसिरहेको छ, रेमिट्यान्स आइरहेको छ, तर पनि आयोजना किन अघि बढ्दैन ?’

यसैगरी एमाले सांसद योगेश भट्टराईले कर्णाली प्रदेशजस्ता दुर्गम क्षेत्रमा जलाशययुक्त आयोजना निर्माण हुनु विकासको दृष्टिकोणले महत्त्वपूर्ण भएको उल्लेख गर्दै सामान्य विवाद वा प्रक्रियाजन्य कारणले आयोजना रोकिनु अनुचित नभएको बताए ।

उनले भने, ‘खासगरी कर्णाली जस्तो क्षेत्रमा जलासययुक्त आयोजना बनिरहेको अवस्था छ । यसो हुँदा उक्त क्षेत्रमा विकासको कुरालाई हेर्दाखेरि एउटा महत्वपूर्ण आयोजना हो कर्णाली प्रदेशको । त्यसैले सामान्य कारणले निर्माण प्रक्रियालाई रोक्न उचित हुँदैन । यसमा ठेक्का प्रणालीमा केही समस्या छ भने सम्बन्धीत निकायमा कागजातहरु सबै हेर्ने उहाँहरुको जिम्मेवारी हो ।’

यसैगरी सांसद अमनलाल मोदीले ठेक्का प्रक्रिया पार गर्ने क्रममा चिनियाँ कम्पनी जियाङ्सी कन्स्ट्रक्सन इन्जिनियरिङ कर्पोरेसनले फर्जी कागजात पेस गरेको विषयमा सार्वजनिक लेखा समितिमा परेको उजुरीको विषय उठाए ।

चिनियाँ कम्पनी हेजाउले जगदुल्ला हाइड्रोपावर कम्पनीले आफ्नो नाम र छाप नक्कल गरेको भन्दै उजुरी दिएपछि विवाद थप गहिरिएको हो । आयोजनाबारे संसद्‌को सार्वजनिक लेखा समिति, अदालत र अख्तियार दुरुपयोग अनुसन्धान आयोगमा समेत उजुरी परेका कारण निर्माण प्रक्रिया अघि बढ्न सकेको छैन ।

छलफलमा, आयोजनामा पेश गरिएको एनयुजर सर्टिफिकेटमा मिति र सही नभएको, र केवल बाँधको फोटो बुझाइएको विषय पनि उठाइएको थियो । अन्य संरचना जस्तै सुरुङ, पावरहाउसको विवरण नबुझाइनु र आधारभूत प्राविधिक मूल्यांकन नभएको भन्दै समितिले प्रश्न उठाएको छ ।

सार्वजनिक लेखा समितिका सभापति ऋषिकेश पोखरेलले आयोजना सम्बन्धी ठेक्का प्रक्रिया र मूल्यांकनमा देखिएका त्रुटि गम्भीर रहेको बताए । उनले यस विषयमा सम्बन्धीत निकायलाई नै  जवाफदेही हुनेगरि आवश्यक प्रक्रिया अगाडि बढाउन निर्देशन दिए मात्रै यो विषय टुंगोमा पुग्ने बताए ।

उनले भने, ‘यो विषयवस्तु गम्भीर नै छ । यसमा छलफल पनि  भैइरहेको छ । यो  विषयवस्तु अदालतमा विचाराधीन छ । त्यसैले यो विषयमा थप छलफल अगाडि बढाइराख्नुपर्ने र निष्कर्ष  दिने अवस्था छ्रैन । प्रचलित कानुन विपरित नहुने गरि सम्बन्धित निकायलाई नै जवाफदेही हुनेगरि आवश्यक प्रक्रिया अगाडि बढाउन निर्देशन दिने भन्ने कुरा गर्यो भने टुंगोमा पुग्छौं होला ।’

यसैगरी जगदुल्ला जलविद्युत हाइड्रोपावर कम्पनी लिमिटेडका प्रमुख कार्यकारी अधिकृत सञ्जय सापकोटाले सम्पूर्ण कार्य स्थगन गरी लेखा समितिको निर्देशनको पालना गरिरहेको बताए ।

उनले भने, ‘हामीले सम्पूर्ण कार्य स्थगन गरी लेखा समितिको निर्देशनको पालना गरिरहेका छौं । ठेक्का प्रक्रियामा भएको मूल्यांकनमा आधार बनाएर वितरकसँग सोधपुछ गरिसकेका थियौं र फाइनान्सियल खोलिएको थियो, तर अब लेखा समितिको निर्णय कुर्दैछौं ।’

थप समाचारहरु

मदन भण्डारीको जन्मजयन्ती मनाइने, संयोजकमा डोरमणि पौडेल चारवटा संसदीय समितिको बैठक बस्दै, यस्ता छन् कार्यसूची विकासशील राष्ट्रहरूको साझा अनुभव नै कृषिको विकासका लागि ठूलो स्रोत हुन सक्छ : कृषिमन्त्री अधिकारी नवनियुक्त सामान्य प्रशासन मन्त्री न्यौपानेले सपथ लिँदै काठमाडौं नगर सभाको १७ औँ अधिवेशनबाट दुई वटा विधेयक स्वीकृत राप्रपाले भोली भ्रष्टाचार विरुद्धको प्रदर्शन सहित आयोगमा ज्ञापनपत्र बुझाउने