सरकारको कुशासनले प्रतिगमनलाई मौका दिएको छ : प्रचण्ड

काठमाडौं । नेकपा माओवादी केन्द्रका अध्यक्ष पुष्पकमल दाहाल (प्रचण्ड) ले हालको सरकारले प्रतिगमनकारी शक्तिहरूलाई बलियो बन्ने मौका दिएको आरोप लगाएका छन् ।

 

 

आइतबार काठमाडौंमा आयोजित माओवादी केन्द्रको भ्रातृ संगठन योङ कम्युनिष्ट लिग (वाइसिएल) तेस्रो राष्ट्रिय सम्मेलनको उदघाटन समारोहमा बोल्दै उनले यथास्थितिवादको राजनीति संविधान र गणतन्त्रका लागि खतरा बनेको बताएका हुन् ।

 

 

उनले भने, ‘संंविधानको रक्षाको पक्षमा उभिनेहरूसँग कार्यगत एकता वा तालमेल हुनसक्छ । तर, प्रतिगमनको नाममा भ्रष्टाचारलाई संरक्षण गर्ने र इमानदारमाथि कारबाही गर्ने कार्यहरूलाई समर्थन गर्न सकिन्न । तर अहिले प्रतिगमनले जसरी टाउको उठाएको छ त्यो गणतन्त्र समर्थन गरिदिएको भरमा भ्रष्टाचारीलाई बचाउने, कुशासन कायम गर्ने, इमानदारहरुलाई कारवाही गर्ने सरकारबाट भएको छ । यसका कारणले पनि प्रतिगमनले टाउको उठाउने मौका पाएका छन् । हामी यथास्थितीवादलाई वैचारिक राजनीतिक रुपले कहिकतै छुट दिन सकिने ठाउँमा छैनौं । अहिलेको सरकार र त्यसको नेतृत्ववालाहरुले यथास्थितीवादी धाराहरुको प्रतिनिधित्वो गरिरहनु भएको छ । उहाँहरु परिवर्तन र प्रगतिको पक्षमा नभइ जनताले पाएको अधिकारलाई पनि खोस्ने लाइनमा हुनुहुन्छ ।’

 

 

प्रचण्डले संविधानको रक्षालाई माओवादी केन्द्रको प्रमुख प्राथमिकता भएको बताए । उनले वर्तमान सरकार यथास्थितिवादी धाराको प्रतिनिधि बनेको र जनताको अधिकार खोस्ने दिशामा अघि बढिरहेको आरोप लगाए ।

 

 

साथै उनले हालको सरकारप्रति आफ्नो पार्टीले निरन्तर खबरदारी गर्दै आएको र भ्रष्टाचारविरुद्धको अभियान पनि चलाइरहेको बताए ।
उनले भने, ‘एकातिर सरकारलाई निरन्तर खबरदारी गरिराखेका छौं भने अर्को भ्रष्टाचार विरोधी अभियान थालेका छौं । हामीले केही राम्रा रेर्कडहरु बनाएकै छौं ।’

 

 

राजावादी शक्तिहरूले गणतन्त्र माओवादीकै उपलब्धि मात्र भएको भन्दै भ्रम फैलाउन खोजेकोप्रति प्रचण्डले आपत्ति जनाए । साथै उनले उनले आगामी दिनहरूमा प्रतिगमनविरुद्ध अझ बलियो प्रतिरोध गर्ने प्रतिबद्धता व्यक्त गरे ।