४ माघ, पोखरा । ‘ई–प्लानेट नेशनल हाई स्कुल टी टेन क्रिकेट च्याम्पियनसिप २०८१’ को गण्डकी छनोट प्रतियोगिताको उपाधि कास्की मोर्डनाइज्ड एकेडेमीले जितेको छ ।
पुस २८ देखि माघ १ गतेसम्म पोखरा क्रिकेट मैदानमा आयोजित प्रतियोगिताको फाइनल खेलमा कास्की मोर्डनाइज्ड एकेडेमीले मदरल्यान्ड सेकेन्डरी स्कुललाई ८ विकेटले पराजित गर्दै उपाधि हात पारेको हो ।
फाइनल खेलमा मदरल्यान्डले दिएको ८७ रनको लक्ष्य कास्की मोर्डनाइज्डले ८.१ ओभरमै २ विकेट गुमाएर पूरा ग¥यो । कास्कीका सोहेल कुँवरले विस्फोटक ब्याटिङ गर्दै ३४ बलमा ६७ रन बनाए । उनले २ ओभरमा १६ रन दिएर २ विकेटसमेत लिएका थिए । जिरे मगरले १० रनको योगदान दिए ।
यसअघि टस जितेर पहिले ब्याटिङ गरेको मदरल्यान्ड सेकेन्डरी स्कुलले १० ओभरमा ६ विकेट गुमाउँदै ८६ रन बनाएको थियो । मदरल्यान्डका लागि ग्रीश केसीले २० रन र सक्षम क्षेत्रीले १८ रन बनाए । कास्कीका बलर सोहेल कुँवरले उत्कृष्ट प्रदर्शन गर्दै २ ओभरमा १६ रन दिएर २ विकेट लिए भने शुभम गिरिले १ विकेट लिए । गण्डकी छनोट प्रतियोगिताको ‘म्यान अफ द म्याच’ को उपाधि सोहेल कुँवरले जिते ।
प्रतियोगिताका अन्य उत्कृष्ट खेलाडीहरुमा गण्डकी छनोटको उत्कृष्ट बलर श्री बाराही सेकेन्डरी स्कुलका अनिश पटेल रहेका छन् । यस्तै, उत्कृष्ट ब्याट्सम्यान र उत्कृष्ट खेलाडीमा कास्की मोर्डनाइज्ड एकेडेमीका सोहेल कुँवर रहेका छन् ।
गण्डकी छनोटबाट विजयी कास्की मोर्डनाइज्ड एकेडेमीले अब राष्ट्रिय फाइनलमा प्रतिस्पर्धा गर्नेछ । राष्ट्रिय फाइनल माघ २३ देखि २६ गतेसम्म काठमाडौंमा आयोजना हुनेछ, जहाँ ७ प्रदेशका विजेता टिम र आयोजक टिम गरी ८ टिमले उपाधिका लागि प्रतिस्पर्धा गर्नेछन् ।
थप समाचारहरु
गैँडाकोट हाफ म्याराथनको उपाधि आर्मीका धावकलाई
खेलकुद पत्रकार मञ्च गण्डकीमा आस्थामगर निर्वाचित
टाइगर कप भलिबलः हेल्प नेपालसँग पराजित हुँदा प्रतियोगितबाट बाहिरियो एपिएफ
तनहुँमा फागुन १३ गतेदेखि म्याग्दे गाउँपालिका दोस्रो अध्यक्ष कप हुने
गण्डकी प्रदेशस्तरीय भलिबलको उपाधि गलकोटलाई
खेलकुद क्षेत्रको विकासका निम्ति पर्याप्त लगानी नभएको गुनासो
