२ जेठ, हेटौंडा । बागमतीमा सत्ता साझेदार दलहरुबीच भागबण्डा मिलाउन मन्त्रालय विभाजन गरिएको छ ।
बुधबार बसेको मन्त्रिपरिषद बैठकले सामाजिक विकास मन्त्रालय फुटाएर युवा तथा खेलकुद मन्त्रालय बनाउने निर्णय गरेको एक मन्त्रीले बताए ।
नयाँ मन्त्रालय खडा गरेपछि डेढ महिनादेखिबिना विभागीय मन्त्री रहेकी एकीकृत समाजवादीकी नेतृ रमा आलेमगरले युवा तथा खेलकुद मन्त्रालयको जिम्मेवारी पाएकी छन् ।
१९ चैतमा मन्त्री नियुक्त भएकी एकीकृत समाजवादीकी नेतृ आले झण्डै डेढ महिनादेखि मन्त्रालयविहीन थिइन् । उनलाई जिम्मेवारी दिन माओवादी नेतृ कुमारी मोक्तानले सम्हालिरहेको सामाजिक विकास मन्त्रालय फुटाइएको हो ।
१२ सदस्यीय रहेको बागमती मन्त्रिपरिषद मन्त्रालय विभाजनपछि १३ सदस्यीय भएको छ ।
