१४ पुस, काठमाडौं । प्रधानमन्त्री कप महिला टी-२० प्रतियोगिताको लिगचरणमा अपराजित हुँदै एपीएफ क्वालिफायर्समा पुगेको छ ।
लिगको अन्तिम खेलमा बागमतीलाई ४७ रनले पराजित गर्दै एपीएफ सीधै क्वालिफार्यसमा पुगेको हो ।
मूलपानी क्रिकेट मैदानमा टस हारेर ब्याटिङ गरेको एपीएफले निर्धरित २० ओभरमा तीन विकेट गुमाएर १२६ रन बनाएको थियो ।
१२७ रनको लक्ष्य पछ्याएको बागमतीले निर्धारित २० ओभरमा ८ विकेट गुमाउँदै ७९ रनमा सीमित भएपछि एपीएफ ४७ रनले विजयी भएको हो ।
बागमतीका लागि सोनी पाख्रिनले सर्वाधिक २० रन बनाइन् । यशु पाण्डेले १८ बलमा ३ चौकासहित १७ रन बनाइन । खुसी डंगोल र संस्कृति फूयाँल क्रमशः १० र २ रनमा अविजित रहे ।
एपीएफका लागि सुमन विष्टले सर्वाधिक २ विकेट लिइन् । सोनु खडेका, करुणा भण्डारी, नेरी थापा र सीता राना मगरले समान एक/एक विकेट लिइन् ।
त्यसअघि ब्याटिङ गरेको एपीएफका लागि सीता राना मगर सर्वाधिक ४४ रन बनाइन् । उनले ५० बलमा ४ चौका प्रहार गरिन् । ज्योती पाण्डेले १३, इन्दु बर्माले २८ रन बनाइन् । रोमा थापा १९ रन र ममता चौधरी १२ रनमा अविजित रहे ।
बागमतीका लागि संस्कृति फूयाँल, मनिषा उपाध्याय र सविका यादवले एक/एक विकेट लिइन् ।
एपीएफसँग परािजत भए पनि बागमती पनि प्लेअफ पुगिसकेको छ ।
एपीएफले ७ मा ७ जितसहित १४ अंकको साथमा शीर्ष स्थानमा छ भने बागमती ७ मध्ये ४ मा जित र तीनमा हार बेहोरेको छ ।
