२० साउन, चितवन । चितवनको भरतपुरस्थित मनकामना अस्पतालले उपचारको क्रममा एक गर्भवतीको मृत्यु भएपछि २७ लाख ५० हजार रुपैयाँ पीडित परिवारलाई तिरेको छ ।
अस्पताल प्रशासन र मृतकका आफन्तबीच शनिबार भएको वार्तापछि अस्पतालले गल्ती स्वीकार गर्दै क्षतिपूर्ति दिएको वार्ताका एक सहभागीले बताए ।
भरतपुर महानगरपालिका वडा नं. २६ कि ३५ वर्षीया नविना महतो थारूको उपचारको क्रममा शुक्रबार राति मृत्यु भएको थियो । मृतकका पति मणिकलाल महतो थारूका अनुसार गत बिहीबार उपचारका लागि ल्याइएकी नविनालाई शुक्रबार राति १ बजे अस्पतालले मृत घोषणा गरेको थियो । बच्चा जन्मिएपछि साल निकाल्दा अधिक रक्तश्राव भएको जानकारी गराएको पति मणिकलालले बताए ।
साल पाठेघरमा टाँसिएको भन्दै चिकित्सकले अधिक रक्तश्राव रोक्न नसकिएकाले पाठेघर नै फालेर बिरामी बचाउने प्रयास गरेको अस्पताल स्रोतको दावी छ । पाठेघर निकालेपछि उनको शरीरको विभिन्न भागबाट रक्तश्राव (बीआईसी)भएर उनको मृत्यु भएको थियो ।
अस्पतालको लापरबाहीले मृत्यु भएको भन्दै आफन्त र छिमेकीले अस्पतालमा आन्दोलन गरेपछि दुबै पक्षबीच सहमति गरिएको हो ।
मृतकका आफन्तले अस्पतालले गल्ती स्वीकार गर्नुपर्ने बताउँदै आएका थिए । सहमतिपछि अस्पतालले शनिबार नै २७ लाख ५० हजार रुपैयाँको चेक पीडित परिवारलाई हस्तान्तरण गरेको छ ।
